مسأله مبدأ...

صباح جديد,زي كل صباح عدي عليك,تقفل عينيك و تقوم,تمد ايدك تغطي وشك بالماسك,محفوظ كويس طول الليل,ماسك متعدد الطبقات,فلان بيحب كده و فلان مبيحبش كده,و الطبقتين دول عشان فلان مش معروف بيحب كده و لا مبيحبوش,تحط قبل الماسك كريم,لمنع التشققات,اسوأ شئ ان الوش يتشقق تحت الماسك و يقع لجوه, لاخر مره تراجع دورك,اللي قعدت تتمرن عليه ساعه بعد النوم و ساعه قبل ما تصحي,تلات لفات,وقوف,ثبات,و لفه كمان لزوم الدور,و تمسح اثار رجليك كمان,عشان الدور ملوهش اثار,مجرد لف فردي علي السلالم.
تعمل تمرين صباحك,جري في اللا مكان,عشان اكل عيشك و عرق الجبين,تدندن بلحن اغنيه,سمعها غيرك في زمن تاني,اصل زمانك معادش فيه اغاني,و لو فيه اغاني حتتسمع في زمن بعدك,تنفض لاخر جريتين في اللا مكان,محدش اصله جاب سيره الاتقان,يزغول شئ علي جنب صدرك,فتهبده بخبطه,فيخرس شويه,تقول لنفسك بفكر اشيله,بس لو سبته شويه ممكن يدبل و يقع,تجيلك الفكره علي جوع فطارك,فتحبس باخر بروفه لدورك,تفتح الباب عشان تنزل,تلاحظ تشقق خفيف بيبتدي يتكون,تقول مش مهم,التشققات اللي جوه مش بتبان,تقفل بابك وراك و تنزل,يزغول تاني زغوله خفيفه,و يقف,المره دي مش محتاج خبطه,تكمل نزولك علي السلالم........