شخصي,مبهم (فضفضه)...

صعب اقول لحد
يطبطب عليا
و انا مش عارف اطبطب علي روحي
و ايديا بس حاططها جنبي
صعب اكون فرحان
و اطيرني طياره ورق
و انا لسه فاكر
كل ذكري حصلت من اي حد

استيكه الوقت

بتعدي علي كل الناس
و تنسيهم دايما الوحش
علشان يفضلوا فاكرين بس
كل حاجه حلوه حصلتلهم
الا انا
كله مطبوع عندي
بحبر مش بيتمسح
و لا حتي قادر
اقلب الصفحه اللي مفتوحه
كل اللي قادر اعمله
احاول ارفع ايدي من جنبي
و احاول اوصلها لفوق
يمكن مع التكرار
اقدر اطبطب عليا

يوتوبيا للحمقي...

طول عمره العالم
مش سايب مكان
للي فاكرينه مكان احسن
بيبصوا عليه
من ورا نضاره وردي
شايفينه يوتوبيا
مثاليه
و الناس من احسن ما يكون
شايفينه من غير اسافين
و لا حد يعضك بسنانه
اول ما تلف و تديله ضهرك
دايما مع اول اختبار
يا اما بيقعوا
و يخرجوا خالص من المنافسه
يا اما جلدهم بيتخن
و مع الوقت
بيتحولوا لاجمد سنان
بتخرج الجداد من اللعبه
و يقولوا علي اول عضه
كانت تجربتي اللي اتعلمت منها
و بنتني
و صنعت مستقبلي
و علي الجداد
انهم كان لازم يخرجوا
الدنيا مفيهاش مكان لحد ضعيف
هما دول
صناع اليوتوبيا المثاليه
المكان الاشيك
لاصحاب النضارات الغير ورديه