بقينا كبار
يوم ما مراجيح المدرسه نسيتنا
و البلي الملون قعد وحيد في درج المكتب
بيفتكر ايام ما كان بيرمح في الشارع
خلاص نسينا اليونيفورم
و الشنطه المليانه كراريس
و الاساتيك و البرايات
اللي كانت اقلامنا بتشتكي منها
بقينا خلاص كبار
عرفنا يعني ايه عيب و حرام
و نفاق و كدب و مجامله و مصلحه
و عرفنا انه من ساعتها و القلم
عمال بيسطر في الصحايف الكلام
من ساعه ما شالونا من كراسات الرسم
و رمونا في خليط الرمادي و السواد
و لما نتبري من كتر التعب
رجلينا ترجع بينا تاني
للمراجيح اللي كانت مره نسيتنا
نلاقيها برده من جوه لسه فكرانا
ماهو اصل محدش يقدر يمسح الذكري
من جوه مرجيحه لعب عليها طفل مره
بس نلاقي اننا و للاسف
كبرنا كتير علي اننا نقعد علي مرجيحه
نخاف عليها لتقع تتكسر و الذكري لسه جواها
نسند عليها في صمت و نفتكر
لما بقينا كبار
و افتكرنا ان مراجيح المدرسه نسيتنا
Subscribe to:
Post Comments (Atom)
No comments:
Post a Comment