مزيكا هاديه سولو...

زمان كانوا بيقولولي
الحياه ماهيش دايما
مزيكا هاديه سولو
خلي بالك لتتكعبل
و انت بترقص معاها
تقع قصاد نفسك
تقع قصاد الناس
و تكسر كعبها العالي
فتشخط فيك
و يمكن تفضل ساكته
و تخبيلك في سرها
مقلب اكبر في رقصه تانيه

هما اللي بيزعلوا
و محدش بيطبطب عليهم
مش برضه بيبقي ليهم
ضحكه كده للزينه
بيضحكوها قصاد الناس
و يفضلوا شايلين في جيوبهم
اخر شويه من عزه نفسهم
يداروا بيها
بوادر اول دمعه
تمسح الضحكه اللي كانت

وزي الطيبين
ساعات بسكت
ساعات بنطق
و ساعات بخرس
و افضل كتير ساكت
فانفجر
اطق و اطرشق
بس الطوفان ينشف
يرجع كما الاول
صحاري
رملا صفرا
عشان اولا عن اخر
انا زي الطيبين