تطور...

تفتكر ليه
المحار عمره ما طلع سلم التطور
و عرف يعوم في البحر زي السمك
هل مثلا عشان
قافل عليه شباكه
و بقفل ساكك بيبانه
خايف لجو البحر بره يخنقه
بيقول لنفسه
هنا انا بعيد عن تفاهات الغجر
مكبر دماغي عن سفاسفهم
خليني هنا لوحدي اكون لؤلؤه
نسي الخايب ان المحاره
اللي مسموح ليها تكون لؤلؤه
هي بس اللي بتفتح و لو فرجه صغيره
يدخل لها من العالم الخارجي
حبه الرمل اللي حتبقي نواه اللؤلؤه
المحار الحقيقي
يعني اللي بيكون لؤلؤ
مش بيخاف من العالم اللي بره
بيفتح صدره لكل الاحتمالات
اه ماشي
ممكن سمكه معديه تاكلني
بس علي الاقل حموت و انا بعمل حاجه
ممكن حد تاني يفتكرني بيها
مسكينه قوي المحاره دي
اللي قفلت علي نفسها
بيقولوا في اخر حياتها
بقت طبق لذيذ
في مطعم ماكولات بحريه
علي شط اسكندريه