تلميحات ساكته...

صفه الموضوع
ساكت
اسم الموضوع
ميت
علشان محدش نغبشه
بيبربشوا؟
طبعا عشان الضي كان جامد عليهم
عمي عينيهم
من جنانه اتدروشوا

صفه الموضوع
ازلي
اسم الموضوع
اسمي
علشان في الاصل مني
فسايبه في قمقمه
علشان ما يستجراش
يهرب و لا يرجعش
و افضل ادور فازهق
و اقبض علي غيره
و جوايا احبسه
و بضلمتي ادنسه
و ادهس في روحه
اهرسه

صفه الموضوع
واطي
اسم الموضوع
انسان
يضحك
يبكي
يقلع في وشوش
يلبس الوان
و يقول يا وحوش
ده انا انسان
عمري ما كدبت
و لا كنت جبان
و يجيله الخوف
يغلط يكدب
يهرب طيران
تبرير موجود
ده انا انسان

وشوش مش متضفره...

و مفكوكه
وشوشكم
طبعت علي شيشكم
ملامحكم
خايبه و مش واضحه
و سافرت بره شباككم
عشان اصلا
لا ليها سكه و لا طريق
الا بدوشتكم
فسامحوني
لو اطلب تغسلوا وشوشكم
عشان لما تقابلني
و اصور في ملامحها
تنور لقطه الصوره
و افك ضفيره بضفيره
و اطير في فضاي
صوتكم
فسامحوني
لو اطلب تغسلوا وشوشكم
و اضفرها في ملامحكم
عشان تجري في سكتها
و متطبعش علي شيشكم

وشوش و متضفره...

كل الوشوش
اصلا
خيوط
مغزوله متضفره
في حواري متبعتره
لا ليها سكه و لا طريق
الا العيون المنوره
و انا سكتي قفلتها
من كتر ما لقيت انها
فاضيه
و لا العفاريت حتي بيخطوا فيها
و دنيتي ضلمتها
علشان اداري وشها
خاصمتها
و لا بصيتش في عينيها
يا كل وش تاه في سكتي
و لا وصلشي
الذنب ذنبي
انا طفيت قنديلي
و نمت في سريري
و عليكوا ما طليتشي
خلتني جوا البيت
لحد ما اتهديت
انا و خيوطي المضفره
تهنا
في حواريكوا المبعتره

صباحك مسكر...

صباحك ملون
يا سكر زياده
يا قاعد تمزمز
في فنجان قهوه ساده
صباحك مسكر
حلاوته زياده

حبيبي بقولك
صباحك مسكر
عشان لو في مره
لبابك مسكر
تفتح بيبانك
ده يومك مضفر
في اجمل قصيده
يقولك كلامها
صباحك مسكر

قزاز عمري...

و تتسرسب
و تتسرب
فيتكهرب
نظام عمري
و لا عارف
حتتبخر
حتتكثف
علي قزازي
لكن عارف
في لحظتها
بحب الكلمه بتقولها
و احب اللحن من صوتك
و اقول يا ريته يتكثف
و يفضل في قزاز عمري

كونشرتو معاكس...

عودتني الا انتظرك,عودتني ان تتواجد دوما هنا و هناك,تتجول,تتامل,تنادي علي و اجيبك,انادي عليك و تجيبني, تنبعث موسيقاك الخاصه فتغير قليلا من موجات الصمت الممله المنتشره بالهواء,نتناقش فانتصر انا دوما او تنتصر انت,لم يكن مهما,المهم انك كنت دوما موجودا,و في المتناول.
اعتذر لانك عودتني الا انتظرك,لا استطيع ان اشعر تجاهك بالوحشه,و لا ان امرر شريط ذكرياتي معك امامي,لم تترك لي حتي ايه خطابات لاقراها,و استعيد بها جزءا منك,كان لزاما,ان افقدك كليا عندما ترحل,لم استطع حتي ان امسك باخر خيط دخان تبقي منك.
اكتب اليك هذا الخطاب,لاكون قد وفيت دينا التف طويلا حول عنقي,و لاتمكن من ان امحوك كليه,و لاخر مره,من ذاكرتي الضعيفه,اعرف اننا كنا قديما,شيئا ما,و لكنك كنت دوما تنصحني,بان ادع نفسي اسري مع مجري الحياه,حتي اصل للمصب,و لا داعي ابدا,لأن احتفظ بذكريات عن اماكن و اشخاص عبر المجري, اعلم جيدا انني لن اعيشها ثانيه,الي اللقاء ايتها الذكري الاخيره منك,و اعتذر ثانيه,لانني لن انتظرك.

المتطلعون من خلف الزجاج...

المتطلعون من خلف الزجاج,المغطي بالضباب المتكاثف,يحدقون في الفراغ الابيض المترائي,خلف الزجاج البارد.
الزجاج الذي ينفتح ببطء,تترائي من خلفه الوان اكثر اشراقا,من البياض المبتل الملتصق بالنوافذ.
الرياح التي ترتطم بوجوههم,تعبث بشعورهم,تبث قشعريره و شعورا ما,غامضا,باجسادهم النحيفه.
المتطلعون من خلف الزجاج,يتراجعون للخلف خطوه,و يفكرون,و يقلبون الامر علي جميع اسطحه,في اذهانهم البارده.
الرياح التي ترتطم بوجوههم,تحاول ان تخترق القشره الرقيقه,و لكنها تفشل في ذلك,فشلا مريعا.
الزجاج الذي ينغلق ببطء,تغلقه الايدي الكثيره,للمتطلعين من خلف الزجاج,و الذين شعروا بهلع الفكره لبرهه.
الزجاج الذي,اصبح الان ابيضا و مغطي بالضباب المتكاثف,و الذكري الاخري المتبخره,لالوان اكثر اشراقا.
المتطلعون من خلف الزجاج,يعدون الان خطتهم,لمواجهه الهجمه القادمه,عندما ينفتح الزجاج بطء,ليسمح للرياح بان تعبر,و ترتطم بوجوههم.

كنا و لا كناش...

و لاننا
كنا و لا كناش
فبلاش
اجيب سيره اللي فات
خليه كده مدفون
خلي الغشاوه عالعيون
و العطر اللي في الهوا سرسب
فضاع
و خد معاه الحلم و اتغرب
فبلاش كده نقرب
خلي البعاد احسن
سوري اللي بيني و بينك
و كلام في عيني و عينك
لا اتقال و لا حيتقال
لاننا
كنا و لا كناش

كونشرتو...

وضعت الشريط بالمسجل,انبعث صوت الكمان,حزينا,مختلطا بدقات البيانو,شعرت برهبه غامضه و خافته تملأها, "طول عمري بحب قوي اسمع المزيكا دي,متشكر انك جبتيلي الشريط ده هنا,من ساعه ما جيت و انا مشتاق اسمع مزيكا,مفيش غير صوت الاجهزه و عربيات الاسعاف",ابتسامه راضيه ملأت وجهه,و دمعه اخري جرت علي خدها,مسحتها بعصبيه "انت لما قلتلي عايز اسمع مزيكا,قلت دي اكتر حاجه بتحبها,بس كان صعب قوي الاقيها وسط شرايطك,طول عمرك كن..",جزت علي اسنانها,بعنف و يأس,"بتعيطي ليه بس,انتي عارفه اني بكره قوي اشوفك و انتي بتعيطي,خليكي جامده امال",ضحك بضعف,و مسح باصابعه الدمعتين المتتاليتين علي خدها,"تعرفي,انتي لما تتجوزي انشاءالله,حتبقي زوجه وفيه قوي",تمتمت "انا مش حتجوز غيرك",ضحك هذه المره لمده اطول,انهي الضحكه بسعله متعبه,"بطلي كلام عيال,انتي حيبقي ليكي حياتك و جوزك و بيتك,بس بجد حتبقي زوجه وفيه قوي,يا بخته ده اللي حيتجوزك,واحده تانيه كانت سابتني اول ما عرفت اني عيان,بس انتي بجد طلعتي جدعه",صوت الكمان ينحني ببطء,يترك محلا لدقات اعلي للبيانو,"فاكره لما قلتلك نفسي اعيش في بيت علي البحر,اهو انا دلوقتي شايفك في البيت ده,و ابنك و بنتك قاعدين بيبنوا بيت رمل,و انتي قاعده تحت شمسيه خضرا,و تقومي ترشي عليهم ميه,حتبقي جميله قوي وقتها",يكسر سعاله نعومه الكمان,تنهض و تحضر له كوبا من الماء,تعطي له ظهرها,كم كان جميلا ذلك الحلم,للاسف انتهي,"انتي بتعيطي تاني,انا عارف انك حتنسيني,محدش بيفضل فاكر كل حاجه علي طول,انا مره زمان كان عندي قطه بحبها قوي,و ماتت,فضلت يومين لا باكل و لا بلعب,بس في الاخر,زهقت من كتر الحزن و قررت اكمل حياتي عادي,لحد دلوقتي ساعات بفتكرها و بقول يا تري هي فين,بس مبحسش اكتر من اني ببص من ورا ورقه سلوفان,احساس شفيف قوي يعني, تعرفي انتي تعملي كده",التفتت له,مسحت دموعها و ابتسمت.
الدقه الاخيره,العنيفه,للبيانو,دوي صوت الرعد,"ايه ده,دي بتمطر,تصدقي بقالنا كتير قوي مجريناش تحت المطر",هزت راسها ببطء "سنه تقريبا","طيب ممكن اطلب منك طلب,ممكن تجيبيلي شويه مطر من بره",
باستغراب شديد نظرت اليه,ثم هزت راسها و ابتسمت,اتجهت نحو النافذه,و ملأت يدها,باطراف اصابعه البارده, استشعر كف يدها الندي,شعرت بقشعريره تسري في جسدها"معلش معرفتش اجيبلك اكتر من كده",بلل وجهه باطراف اصابعه "كفايه قوي ده",تراجع الي الوراء في سريره,كان يتنفس ببطء و بصوت مسموع,"معلش ممكن تسيبيني عشان عايز ارتاح شويه,تعبت قوي النهارده من الكلام",عدلت وضع الغطاء عليه,و اتجهت نحو الباب, "معلش ممكن ترجعي الشريط من الاول,اصلي بحب قوي المزيكا دي",من بعيد,كان هناك ظل لامراه متدثره بمعطف جلدي باهت,تجري تحت المطر,و قد تندي كفاها بالدموع.

تطور...

تفتكر ليه
المحار عمره ما طلع سلم التطور
و عرف يعوم في البحر زي السمك
هل مثلا عشان
قافل عليه شباكه
و بقفل ساكك بيبانه
خايف لجو البحر بره يخنقه
بيقول لنفسه
هنا انا بعيد عن تفاهات الغجر
مكبر دماغي عن سفاسفهم
خليني هنا لوحدي اكون لؤلؤه
نسي الخايب ان المحاره
اللي مسموح ليها تكون لؤلؤه
هي بس اللي بتفتح و لو فرجه صغيره
يدخل لها من العالم الخارجي
حبه الرمل اللي حتبقي نواه اللؤلؤه
المحار الحقيقي
يعني اللي بيكون لؤلؤ
مش بيخاف من العالم اللي بره
بيفتح صدره لكل الاحتمالات
اه ماشي
ممكن سمكه معديه تاكلني
بس علي الاقل حموت و انا بعمل حاجه
ممكن حد تاني يفتكرني بيها
مسكينه قوي المحاره دي
اللي قفلت علي نفسها
بيقولوا في اخر حياتها
بقت طبق لذيذ
في مطعم ماكولات بحريه
علي شط اسكندريه

عنف مبرر...

"رخيص قوي"
"بس الضروره فرضت نفسها"
"و لو,الصح مش نسبي"
"لو مكانش عمل كده,مكانش حيقدر يوصل للمكان اللي يعمل فيه خير اكتر"
"المبني علي غلط حيبقي غلط"
"ان الحسنات يذهبن السيئات"
اصغي للصوتين المتجادلين,يطول الجدل القائم,اشعر بالنعاس,اغلق الصوت و ابدأ في تخيل نفسي في دنيا اخري, نظيفه و بريئه,الحلم ابيض و مشرق,لا يعكره سوي ظلين,لشخصين مشاكسين يستمران في التجادل كما لو لم يوجد غدا,اتجه اليهما,اصفع احداهما و الكم الاخر,يتكومان علي الارض و ينسحبان بعيدا ببطء,استطيع الان ان اطمئن,و بثقه,انني ساحظي هذه الليله بحلم هادئ,وردي,مشرق.