دون كيشوت...

لما الضلام يخلص
بقفل عليا البيبان
و امد ايدي
اغطي عيني من سكات
يمكن شعاع النور
يزيح عنها الضباب
بفضل كدا
نايم
مليان موات
تفضل عينيا مليانين احزان
افضل انا
ابيض و اسود
اطرد الالوان
سجني بلا جدران
سجني رحابه نفسي
سجني ضلال احلام
استسلم
من قبل ما احارب
اقع عالارض
و اقول يا يأس
من قبل عيني
ما تلمح عدوي
بحارب الطواحين انا؟
و لا بحارب نفسي
بجري ورا النور البعيد
و لا بتوه و اضيع
بندم
و بتخبط
مره احس الثبات
مرات متلخبط
السكه صح؟
السجن حريه؟
الدرب سايب من تحت رجليا؟
و ارجع اقول يا حلم
و ارجع اقول يا يأس
و ارجع اقول يا وقت بيعدي
خدني في ايدك
عديني من البراح
و خدني للسكك
ححط رجلي من جديد علي الطريق
و امشي
و ادوس و اهم
بعزم ما فيا
يتفتحوا عينيا
يبصوا للبعيد اخضر
جنه و جناين شجر
جايلك يا حلم
جايلك يا بكره
جايلك يا بكره