قصايد...

عشرات القصائد,حاولت أن اكتبها لك.
أسلوبي فقير,مفرداتي مكرره,افكاري قديمه.
و لكن علي الاقل,أحاول ان اكتب قصيده من اجلك.
و عندما تقرأين اول قصيده حقيقيه لي,
,ستعلمين كم حاولت كثيرا أن تكون حقيقيه,مثلك تماما.
و حتي ذلك الوقت,سيكون دخول سرداب أفكاري
محرما عليك ,فإلي ذلك الحين,نلتقي.

منك و ليكي

و ليه كل اما يجرحني الزمن
تيجي علي بالي
نسمه بيحدفها الهوا
تفرش الفرحه قبالي
صوره يرسمها خيالي
و اما البكا عالقلب عن
قلبي ندهلك
تمسحي بعطرك دموعه
و اما ييجي معاد رجوعه
يفضل العطر ذكري و شجن

كلام علي الورق

اديني مخزون من الورق و قلم
و سيبلي من الوقت فسحه زمن
اكتب و اشعر من كل لون فكره
اخاف يكون لفكري في دماغي كفن

حكايتنا

قبل كل الحكايات
و بعد كل الحكايات
حكايه بتنحكي عنا
لما شوقنا بان في نور عيوننا
و اما ضحكه قلبك مالشفايف طلت
دبت انا من الشوق ميت مره و مره
و من وسط الحكايات
طلعت حكايه اسود من ضلام الليل
كانت فراق و هجر و شقا
صرخ الهوي منها صرخه و مات
مفضلش من بعده غير صوت السكات
يبكي ينوح
علي كل اللي فات
و فضلت الحكايات
واحده تنحكي عنا
و الباقي جوا الذكريات

...قطر

الشعور بالوحده شئ غريب,بييجي و من غير ما تعرف,بتحس فجاه ببرد جامد كأن فيه ميت شتا,تسكت كل الاصوات كأنك في قلب صحرا,ممكن يكون حواليك ميت واحد بس تحس أنه مفيش منهم حد معاك,يمكن ناس بتحس بالوحده عشان بتقفل قصاد الناس التانيه بيبانها و تحط ستاير نبيتي غامقه علي كل شبابيكها,بس فيه ناس تانيه بتحس بالوحده حتي و هي فاتحه كل بيبانها علي الاخر.
كتبت القطعه الهبله دي و صوت ذكري بيملا فراغ الاوضه "و ان كان بعدك شئ متقدر خدني معاك,خدني معاك من غير ما تفكر خدني معاك"ومش عارف ليه حسيت بأني دايما و طول حياتي مستني حاجة زي قطر كده او اوتوبيس ياخدني بعيد عن كل الحياه الممله دي و يرميني في أي مكان تاني ,مكان فاضي,زحمه,مدينه,قريه,شط,صحرا,أهو أي مكان و السلام,المهم اني انسي كل الوشوش اللي اعرفها و اتوه عن مواعيد كل الحاجات اللي لازم اعملها كل يوم روتينيا,بس برده و في وسط التخيل ده برده بفكر,و بلاقي أن في اي مكان في الدنيا,البني ادم محتاج لبني ادمين تانيين,يقرفهم و يقرفوه,يتدخلوا في تفاصيل حياته أو يهملوه,بس في الاخر بيحتاجهم.
عارف اني بعد الكلام ده حرجع تاني لنفس الحياه,حروح اذاكر او انام او اسمع اغنيه تافهه او حتي اغنيه هادفه,و عارف برده اني حرجع افكر و اسأل نفسي,لو كان بعده شئ متقدر؟هل خدها معاه؟ و هل قطر الحياه الوهمي حييجي و ياخدني معاه و لا حينساني زي كل مره.